Հագուստի մոդելավորում մասնագիտության ուսանողների բովանդակալից պրակտիկան՝ Պարոնյան թատրոնի արտադրամասում
«Հագուստի մոդելավորում և նախագծում» մասնագիտության 3-րդ կուրսի ուսանողներն ուսումնական պրակտիկայի մի մասն անցկացրել են Հակոբ Պարոնյանի անվան երաժշտական կոմեդիայի պետական թատրոնի կարի արտադրամասում՝ պրակտիկայի ղեկավար, դասախոս Քրիստինե Գրիգորյանի ուղեկցությամբ։
Ուսանողները անմիջականորեն ծանոթացել են թատրոնի հարուստ զգեստապահարանին՝ ուսումնասիրել նրա կառուցվածքը, տեսել վերամշակման և վերականգնման գործընթացները, ինչպես նաև մասնակցել գործնական պարապմունքների՝ տասնամյակների փորձ ունեցող մասնագետների շնորհիվ։
Տղամարդկանց հագուստի դերձակ, կարի արտադրամասի վարպետ Ռուբիկ Ադամյանն ուսանողներին փոխանցել է իր փորձը տղամարդկանց հանդերձանքի նախշերի, կտրման և կարի տեխնիկայի վերաբերյալ, իսկ կանանց հագուստի դերձակ Նունե Հովհաննիսյանը ուսանողներին ցուցադրել է կանանց զգեստների ձևավորման նրբությունները։ Հանդերձարանի վարիչ Հայկուշ Բաբլոյանը ներկայացրել է թատրոնի զգեստապահարանը, նրա կազմը, պահպանման և սպասարկման գործընթացները։
Պրակտիկայի ընթացքում ուսանողները ոչ միայն դիտել և վերլուծել են գործնական աշխատանքը, այլև իրենց ուժերով փորձել իրականացնել որոշ աշխատանքներ, ծանոթացել իրական արտադրամասում աշխատելու պրակտիկ կանոններին։ Այս փորձառությունը կարևոր հարթակ է հանդիսացել մասնագիտական գիտելիքները գործնական հմտությունների վերածելու համար, նպաստել է ստեղծագործական մտածողության զարգացմանը և հագուստի դիզայնի ոլորտում պրոֆեսիոնալ մոտեցումների ձևավորմանը։
Ուսանողներին տրամադրված այս բացառիկ հնարավորություն ձեռք է բերվել Երևանի Շառլ Ազնավուրի անվան մշակույթի և արվեստի պետական քոլեջի և Հակոբ Պարոնյանի անվան երաժշտական կոմեդիայի պետական թատրոնի միջև ստորագրված հուշագրի շրջանակներում, որով ամրապնդվել է երկու հաստատությունների արդյունավետ համագործակցությունը և բացել է նոր հեռանկարներ՝ ապագա մասնագետների համար։
Հ.Գ.- «Հագուստի մոդելավորում և նախագծում» մասնագիտության 3-րդ կուրսի ուսանողների պրակտիկայի ընթացքից լուսանկարներն արել են «Լուսանկարչական գործ» մասնագիտության 4-րդ կուրսի ուսանողները՝ նույն ժամանակահատվածում թատրոնում անցկացված իրենց պրակտիկայի շրջանակում: