ՀԱՅ
«Ազնավուր» քոլեջում կայացավ Էսսամ Նագիի «Մոռացված հայրենիք»-ը ֆիլմի փակ ցուցադրությունը
Երևանի
Շառլ Ազնավուրի անվան մշակույթի և արվեստի պետական քոլեջում սեպտեմբերի 27-ին տեղի ունեցավ վավերագրող-կինոռեժիսոր Էսսամ Նագիի «Մոռացված հայրենիք»
վավերագրական ֆիլմի ցուցադրությունը՝ քոլեջի ուսանողների համար։
Վավերագրական ֆիլմը Հայաստանի և Ադրբեջանի սահմաններում կյանքի մասին է, որը պատմում է արցախցի փախստականների մասին, ովքեր 2020 թվականի պատերազմից ներկայումս ապրում են Սյունիքում, ովքեր արմատախիլ են եղել իրենց հայկական պատմական հողերից, որը գտնվում է Արցախում/Լեռնային Ղարաբաղում: Այն պատկերում է հայ քաջ կանանց պատմությունը՝ միահյուսված Հայաստանի պատմությանը։ Ֆիլմը լույս է սփռում Հայաստանի, հատկապես Սյունիքի աշխարհագրական և ռազմավարական կարևորության, նրա պատմական և ներկայիս մարտահրավերների վրա, ինչպես նաև նրա մշուշոտ ապագայի վրա՝ նման անհանգիստ տարածաշրջանի պայմաններում:
«Պայքարի բանաձևը ապրելու մեջ է։ Ցավալի է, բայց մենք անընդհատ ցեղասպանություններ ենք ապրում, մենք անընդհատ պետք է փշրվենք, մոխրի վերածվենք ու հետո փյունիքի նման նորից հառնենք, սա մեր ճակատագիրն է։ Այսօր, 21-րդ դարում, որքան էլ զարմանալի է, բայց մենք պետք է քնենք զենքը մեր բարձի տակ, արդեն կյանքն այդպես է մեզ պարտավորեցնում։ Բայց ոչ միայն ֆիզիկական զենքի մասին է խոսքը, այլ նաև՝ մտավոր կարողությունների, մտավոր ներուժի։ Այսինքն, յուրաքանչյուրս մեր ոլորտում լինենք պատրաստ, հասուն որպեսզի կարողանանք հայրենիքի համար պայքարել»,- ֆիլմի դիտումից առաջ, ողջույնի խոսքում ասաց Երևանի Շ․ Ազնավուրի անվան մշակույթի և արվեստի պետական քոլեջի տնօրեն Վրեժ Կիրակոսյանը, ապա շնորհակալություն հայտնեց ռեժիսորին՝ նախ մեր ազգին՝ ֆիլմի տեսքով անդրադառնալու, և Ազնավուրականների համար ֆիլմի փակ ցուցադրությանը համաձայնելու համար։
«Ես հայ չեմ, բայց շատ կապված եմ Հայաստանի ու հայերի հետ և սա իմ 7-րդ այցելությունն է Հայաստան»,- Վ․ Կիրակոսյանին ի պատասխան ասաց եգիպտացի վավերագրող կինոռեժիսոր Էսսամ Նագին, ապա դիմելով ուսանողներին ասաց․ «Գարեգին Նժդեհը 105 տարի առաջ ասել է, որ եթե չլինի Արցախը, չլինի Սյունիքը, չի լինի նաև Հայաստանը: Հիմա շատ ծանր իրավիճակ է, ժամանակն ամենքիս է մարտահրավեր նետել: Գուցե հայ ժողովուրդն Արցախը կորցնելու ճանապարհին է, բայց դեռ ունի Սյունիքը, իսկ թե արդյոք կկարողանանք պահել այն, պատասխանը յուրաքանչյուրիդ ձեռքերում է։ Դուք, ձեր սերունդն է թելադրելու՝ Սյունիքը կկորցնեք, թե՝ ոչ։ Չեմ կարծում, թե հաջորդ սերունդները կներեն, եթե հանկարծ Սյունիքն էլ կորցնենք։ Սիրելի ուսանողներ ձեր աչքերն ինձ հուշում են, որ հայը կարողանալու է նորից ամուր ոտքի կանգնել ու տեր լինել այն ամենին, ինչն իրենն»,- վստահաբար ասաց վավերագրող կինոռեժիսորն ու առաջարկեց դիտել «Մոռացված հայրենիք»-ը, որն առաջին անգամ ցուցադրվել է նախորդ տարի «Ոսկե ծիրան» կինոփառատոնի շրջանակներում։
Իսկ ֆիլմի ավարտին եգիպտացի վավերագրող կինոռեժիսորը գրեթե մեկ ժամ սիրով պատասխանեց ուսանողներին հետաքրքրող հարցերին և խոստացավ՝ «Ազնավուր» քոլեջի ուսանողների հետ շուտով արդեն գործնական վարպետության–դաս հանդիպում ունենալ։
Լուսանկարները՝ «Լուսանկարչական գործ» մասնագիտության 3-րդ կուրսի ուսանողուհի Սոնա Պետրոսյանի
Հանդիպման մանրամասները՝ տեսանյութում․
