Գործատու–քոլեջ հանդիպում «ՍԱՍՍ ՏԵՔՍ»-ի և Շառլ Ազնավուր քոլեջի միջև
ՄՍԾ Շենգավիթ տարածքային կենտրոնի ղեկավար Արտավազդ Թորոսյանի առաջարկով և Երևանի Շառլ Ազնավուրի անվան մշակույթի և արվեստի պետական քոլեջի կարիերայի ուղղորդման պատասխանատու Լիլիթ Եղիազարյանի նախաձեռնությամբ քոլեջում կայացավ գործատու–քոլեջ համագործակցային հանդիպում։
Քոլեջ էին այցելել «ՍԱՍՍ ՏԵՔՍ» ՍՊԸ-ի հիմնադիր-տնօրեն Քրիստյան Գելիջին, շուկայագետ Ջանսասուն Գելիջին, ՄՌԿ Սալբի Ասլանյանը և գլխավոր տեխնոլոգ Լալա Թորոսյանը։ Հանդիպմանը ներկա էր նաև ՄՍԾ Շենգավիթ տարածքային կենտրոնի ղեկավար Արտավազդ Թորոսյանը։
Հանդիպման ընթացքում քոլեջի «Հագուստի մոդելավորում և նախագծում» մասնագիտության 3-րդ կուրսի ուսանողները հնարավորություն ունեցան ցուցադրել իրենց ստեղծագործական աշխատանքները, որոնք տեղում գնահատվեցին գործատուի կողմից։ Քրիստյան Գելիջին, ծանոթանալով ուսանողների կարի տեխնիկային, կառուցվածքային լուծումներին և մոտեցումներին, տվեց մի շարք պրակտիկ և ոգևորող մասնագիտական խորհուրդներ։
Քոլեջի տնօրեն Վրեժ Կիրակոսյանի ուղեկցությամբ հյուրերը շրջեցին մասնագիտական լսարաններում, ծանոթացան կրթական միջավայրին և դիտեցին ուսանողների ստեղծագործական ներկայացումից մի հատված։
Քննարկելով հետագա համագործակցության համատեղ ծրագրեր, հանդիպման ավարտին կողմերը պայմանավորվեցին զարգացնել համագործակցությունը։ Առաջիկայում նախատեսվում է քոլեջի ուսանողների այցը՝ արտադրամաս, իսկ հեռանկարում նախատեսվում է ուսանողների՝ որպես ապագա աշխատակիցներ ներգրավումը «ՍԱՍՍ ՏԵՔՍ» արտադրամասում, ինչը կամրջում է կրթությունը և գործնական փորձառությունը։