«Սլավյանսկի բազար»-ից հայ պատվիրակները մրցանակներով վերադարձան

Հուլիսի 14-17-ը Բելառուսի հանրապետության Վիտեբսկ քաղաքում տեղի ունեցավ «Սլավյանսկի բազար 2022» ամենամյա միջազգային մանկական և երիտասարդ  կատարողների մրցույթը։ Հայաստանյան պատվիրակները վերադարձել են մրցանակներով։

Մանկական կատարողների խմբում Հայաստանը ներկայացրած 12-ամյա Կարինա Սահակյանը ժյուրիի և մրցույթի կազմկոմիտեի կողմից արժանացել է հատուկ մրցանակի։ Իսկ երիտասարդ կատարողների խմբում՝ Երևանի Շառլ Ազնավուրի անվան մշակույթի և արվեստի պետական քոլեջի շրջանավարտ, 18-ամյա Մարիա Խանդանյանը զբաղեցրել է մրցույթի 3-րդ հորիզոնականը։

«Մանկական կատարողների կազմում Կարինան արել է առավելագույնը, ես գոհ եմ նրա ելույթներից: Ժյուրիի անդամներն ընդգծում էին, որ Կարինան ամենաերաժշտական մասնակիցն է, քանի որ կատարման ընթացքում և՛ պարում է, և՛ երգում»,- ասաց մրցույթում Հայաստանի պատվիրակության ղեկավար Վրեժ Կիրակոսյանը, ով այս տարի ընդգրկված էր նաև ժյուրիի կազմում, որը գլխավորում էր ՌԴ ժողովրդական արտիստ Լարիսա Դոլինան:

Անդրադառնալով, մրցույթի երիտասարդ կատարողների խմբում Հայաստանի պատվիրակ Մարիա Խանդանյանին, Կիրակոսյանը նրա ելույթները գնահատեց փայլուն․ «Մարիան 18 տարեկան է, և այն, ինչ նա արեց այդ տարիքում՝ մրցույթի ժամանակ, բարձր գնահատականի է արժանի։ Նա մեծ ապագա ունեցող երգչուհի է, դեռ շատ ենք հպարտանալու նրանով։ Վերջին անգամ երիտասարդ կատարողների կազմում տասը տարի առաջ էր Հայաստանը հաջողություն գրանցել: Տարիներ շարունակ փայլուն կատարումներով ներկայացել են տաղանդավոր մասնակիցներ, բայց միայն այս տարի սառույցը կոտրվեց՝ Մարիայի շնորհիվ»:

Հայաստանյան պատվիրակների ելույթները կարող եք դիտել ստորև․

Երիտասարդ կատարողների 1-ին մրցութային օր՝ Մարիա Խանդանյանը ելույթ է ունեցել 3-րդ համարի ներքո