«Գնացեք ձեր երազանքի հետևից, երբեք մի վախեցեք սխալվելուց»․ Տիգրան Նալչաջյանը՝ «Ազնավուր» քոլեջի ուսանողներին

Օրերս Երևանի Շառլ Ազնավուրի անվան մշակույթի և արվեստի պետական քոլեջի դահլիճում ուսանողները դիտեցին Տիգրան Նալչաջյանի «Դասարանցիները» ֆիլմը։ Այն պատմում է դպրոցական սիրո, իսկական ընկերության և դասարանի համախմբվածության մասին:

Ֆիլմի դիտման ավարտին, ուսանողները հանդիպեցին ֆիլմի ռեժիսորի հետ և հարց-պատասխանի ձևաչափով իրենց հետաքրքրող հարցերի պատասխանները ստացան Տիգրան Նալչաջյանից։

«Գնացեք ձեր երազանքի հետևից»,- ուսանողներին ասաց Նալչաջյանն ու մասնավորապես դիմելով «Ռեժիսուրա» մասնագիտությունն ուսումնասիրող ուսանողներին խորհուրդ տվեց․ «Նկարահանեք կարճամետրաժ ֆիլմեր, փորձե՛ք, սխալվե՛ք և երբեք մի վախեցեք սխալվելուց։ Ամենակարևորը, ֆիլմեր նկարահանելիս մի կտրվեք այն իրականությունից որտեղ ապրում եք, այլ նկարահանեք ֆիլմեր մեր այսօրվա իրականության, մեր շուրջը կատարվող իրադարձությունների ու երևույթների մասին»։

Հանդիպման ընթացքում ռեժիսորը խոսեց նախապատրաստական փուլում գտնվող «Կատարյալ ապուշը» նոր սոցիալական ֆիլմի մասին, որտեղ համախմբվել են անվանի ու հայտնի դերասաններ։

Լուսանկարները՝  «Լուսանկարչական գործ»  մասնագիտության 2-րդ կուրսի ուսանող Սոնա Պետրոսյանի